KORONADAL CITY – Tuman nga gindagsa sang mga pumuluyo sang siyudad sa Iloilo ang ginpatigayon nga 3rd Bombo Music Festival sa West Visayas State University Cultural Center sa Lapaz, Iloilo sadtong Sabado, Enero 11.
Kadungan man sa nasambit nga hilikuton amo ang espesyal nga pagtambong sang pila sa mga impluwensiyal nga mga pangalan sa patag sang musika kasubong nanday Maestro Ryan Cayabyab, renowned composer nga si Vehnee Saturno, Bituin Escalante, Myrus Ramirez kag ang Jesuit composer nga si Fr. Peter Pojol.
Sa eksklusibo nga interbyu sang Bombo Radyo Koronadal kay Maestro Cayabyab, wala sini natago ang iya kalipay bangud mas nangin manami ang nangin komposisyon sang 12 ka mga finalists.
Ginkilala man sini ang ini nga maayo nga tikang sang Bombo Radyo bangud ginakilala ang mga local composers, songwriters kag interpreters nga ipasundayag ang ila tagsa mga talento sa musika.
Naglapaw man suno pa sa iya expectation ang ginpatigayon nga BMF 2020 kun sa diin nakita ang suno pa world-class nga performance sang tagsa ka mga finalists.
