KORONADAL CITY – Mas ginpahugtan sa subong sang Philippine National Police ang ila intelligence gathering kasunod sang nagluntad nga pagsigabong sa North Cotabato kag Maguindanao nga nagbilin sang 21 ka tawo nga pilason.
Sa interbyu sang Bombo Radyo Koronadal kay PNP-12 spokesperson PLt. Col. Lino Capellan, tinutuyo sini nga ma-monitor ang mga posible nga plano sang mga lawless elements, mangin man ang pagpatuman sang hugot nga security checkpoints sa bug-os nga rehiyon.
Gin-ako sini nga wala pa siya nga wala pa siya sang may nabaton nga report kaangot sa impormasyon nga ginpakigbahin sang Philippine Army nga ginaaligar mga menor de edad kag BIFF ang may kahimoan sang sini nga mga kalakasan sa nasambit nga mga lugar, apang ginpasiguro nga magapatigayon sila sang maid-id nga imbestigasyon kaangot diri.
Samtang ginpahayag man ni Capellan nga wala sila nakakumpiyansa sa mangin plano sang CPP-NPA makaligad ginpirmahan sa tunga sang gobyerno kag komunista nga grupo ang ceasefire agreement.
Suno sa iya, yara ang salig apang nagahalong man sila bangud makapila ka bes na nga ginbayolar sang pihak nga grupo ang nasambit nga kasugtanan.
Sa pihak nga bahin, ginpahayag ni Capellan nga ginmandoan man ni PNP-12 regional director BGen. Alfred Corpus ang mga provincial kag city directors nga maghimo sang mga tikang agud preparahan ang CPP-NPA anniversary sa Disyembre 26.
