MAKILALA, NORTH COTABATO – Liwat nga nagapanawagan sang bulig ang mga bakwit sa Makilala, North Cotabato nga hatagan sila sang maayo nga relocation site bangud sa indi maagwantahan nga sitwasyon sang mga ini ilabi na nga yara sa masobra 500 ka pamilya na ang nagapabilin subong sa bahin sang Malasila Elementary School.
Luwas pa dire, nagaginutok man sa evacuation center sa Santos Land kun sa diin gina agwanta sang mga bakwit ang tuman nga kainiton kun adlaw kag malamig nga paniempo ukon temperatura naman kun gab-I.
Sa interbyu sang Bombo Radyo Koronadal kay Brgy. Luayon kapitan Rably Ramirez, madamo na ang nagamasakit sa mga kabataan ilabi na sa mga katigulangan kun sa diin sa Santos Land, may tigulang na nga napatay bangud sa tuman nga ubo kag iban pa nga balatian.
Suno kay Ramirez, wala sang maayo nga ginahigdaan ang mga residente sa diin trapal lamang ang ila hiligdaan kag nagaginutok na sila sa evacuation centers kag nagalaton na ang mga balatian.
Nahibaluan nga kagaina pasado alas 6 sang aga gintay-og sang Magnitude 4.2 mga linog ang NoCot nga nabatyagan man sa South Cotabato.
