KORONADAL CITY – Ginpa-athag ni Cotabato Acting Governor Emmylou Mendoza nga ang suspension sang klase sa mga pampubliko kag pribado nga mga buluthuan sa kada munisipyo ang magadepende sa local chief executive.
Ini ang bangud ang kada munisipyo, nagkalin-lain man suno pa ang danyos sang linog.
Nagpanawagan man si Gov. Mendoza sa mga alkalde nga magpatigayon sang assessments kun isuspendir ang klase ukon indi.
Una na nga ginpahayag ni Mayor Reuel Limbungan sang Tulunan nga wala sang klase kahapon sa ila nga lugar.
Samtang, gin-anunsyar na ni Kabacan Mayor Herlo Guzman Jr., nga suspendido na ang klase sa tanan nga mga pampubliko kag pribado nga buluthuan sa Kabacan, Cotabato kahapon man nga adlaw.
Sakop sa direktiba ni Mayor Guzman ang suspension sang trabaho sa mga pampubliko nga talatapan.
Magluwas sini, ang Cotabato Foundation College of Science and Technology (CFCST) sa Arakan, Cotabato ang wala man subong subong nga adlaw, Martes kag magabalik sa Miyerkules nga adlaw.
Nahibaluan nga ginkanselar man ang 58th Founding Anniversary kag Tulun Kastifun Celebration sang Tulunan maga-umpisa kuntani kahapon kag magatakop sa November 19, 2019.
Ini suno pa ang agud nga hatagan sang ligwa kag atensyon ang panginahanglanon sang mga biktima sang linog.
Kaangot sini, ginpahayag naman ni DEPED 12 Reg Dir Allan Farnazo, ginsuportahan sini ang kasubong nga tikang ilabi na nga may mga high rise buildings sa North Cotabato ang nagcollaps bangud sa linog.
Suno kay Farnazo, importante nga sekyaron ang safety sang mga estudyante.
