SURALLAH, SOUTH COTABATO – Wala na sang kabuhi sang masapwan sang mga otoridad ang isa ka caretaker sang quarry site sa Barangay San Vicente, Surallah, South Cotabato.
Ginkilala sang kapulisan ang napatay nga si Joel Eleuterio, 32 anyos, single kag caretaker sang Templonuevo Quarrying Site sa nasambit nga lugar.
Sandig sa report, pasado alas-8 sang aga sang nasapwan ang biktima nga patay na sa ginadayunan sini nga bunkhouse.
Naguwa sa imbestigasyon sang mga otoridad nga ginpatay ang biktima usar ang wasay bangud nakita ini nga nakalubong pa sa ulo sang biktima.
Nahibaluan nga nakapadlock pa ang bunk house sang ginpadulungan sang mga otoridad kag wala sang senyalis nga nagbato ang biktima.
Posible suno pa nga ginpatay ini samtang nagakatulog.
Sa subong, ginahibalo pa sang kapulisan ang motibo sang krimen kag ang suspek sa pagpatay kay Eleuterio.
