Ginkalipay suno pa sang world class theatre actress nga si Lea Salonga sang mabaton sini ang imbitasyon agud ambahon ang official theme song para sa 30th South East Asian Games nga may tigulo nga “We Win As One.”
Kabulig sang 48-anyos nga singer sanday musician-composer Ryan Cayabyab kag writer-director Floy Quintos agud mangin madinalag-on lamang ang preparasyon sa ambahanon mangin sa music video nga pagausaron sa nasambit nga 12-day sport meet.
Gin-ako ni Lea nga kinahanglan niya nga tun-an sang maayo ang kada nota kag tono sang ambahanon bangud isa ka dako nga responsibilidad para sa iya ang representasyon sini.
Dugang pa sini, ginaespeho sang official theme ang kaanyag sang kulturang Pilipinhon.
Makit-an sa nasambit nga music video sang “We Win As One” ang seryoso nga paghanas sang mga Filipino athletes nga magaintra sa 56 ka hampang sa palaabuton nga Nobyembre 30-Disyembre 11 nga ipatigayon sa kapin 44 ka venue sa Pilipinas.
