KORONADAL CITY– Napreso na sa lockup cell sang Isulan PNP ang isa ka ugangan makaligad nga ginpatay sini ang iya umagad sa Prk. Mabuhay, Brgy. Bambad, Isulan, Sultan Kudarat.
Ginkilala ang biktima nga si Melvin Talimudao, 33anyos samtang ang suspek amo si Jose Denosta, 67 anyos nga lunsay mga residente sang nasambit nga lugar.
Sa interbyu sang Bombo Radyo Koronadal kay Lt.Col. Joven Bagaygay, hepe sang Isualn PNP, nag-inaway ang mag-asawa nga Talimudado kun diin bangud sa tuman nga kaakig, nagkuha si Melvin sang kutsilyo kag ginhana nga bun-on ang iya asawa sa atubang mismo sang ila duha ka mga bata.
Bangud sa kahadlok sang duha ka bata, nagpanugid ang mga ini sa ila lolo nga si Jose rason nga ginpadulungan sang suspek ang iya umagad kag naaktuhan suno pa mismo ang hana nga pagbuno sa iya bata nga nangin kabangdanan agud luthangon sini ang umagad sang makapila ka bes usar ang 12 guage shotgun.
Nag-angkon naman sang igo sang bala sa abaga kag tiyan ang biktima nga nangin tunaan sang kamatayon sini.
Gilayon naman nga nadakpan ang ugangan nga nagluthang patay sa iya umagad kag nakatalana pasakaan sang nagakaigo nga kaso.
