KORONADAL CITY – Nagpanawagan subong sang bulig ang live in partner ni Jovelyn Panday nga si Jerson Agustin nga isugid sa ila kun sin-o ang yara sa likod sang ginaalegar nga pagpanglugos kag brutal nga pagpatay sa 23 anyos nga babaye.
Sa ekslusibo nga interbyu sang Bombo Radyo Koronadal kay Jerson Josep, tuman ka sakit para sa ila ang nadangatan sang iya live in partner ilabi pa nga nabilin sini ang masobra 2 ka tuig nila nga bata.
Wala suno pa ini naghunahuna sa madangatan sang iya live in partner bangud wala man ini sang kontra ukon sin-o man nga sarang makahimo sang makangilidlis nga krimen sa biktima.
Samtang, ginpahayag man sang ugangan sang biktima nga si Agustin Josep, naglisensya suno pa agud magpangita sang ligbos ang iya umagad.
Ginpangita pa ini sang iya bana, kag nagsinggit pa ang ugangan sini kun diin siya apang nakasabat pa ini.
Ginreport man suno pa sang pamilya ang pagkadula sini kag nangin masako naman sila sa pagpangita apang wala gid ini makit-an.
Kaangot sini, ginahulat na nila ang resulta sang autopsy agud mahibaluan kun ini bala ang ginlugos antes ginpatay base man sa sitwasyon sang biktima sang ini ang nasapwan.
Samtang sa latest update napaidalom na sa post mortem examination ang bangkay ni Jovelyn Panday base kay Police Lt. Col Joefel Siason.
Sa karon nagapatigayon sang backtracking ang Koronadal City PNP agud masundan ang dalagan sang kaso.
