KORONADAL CITY – Nadugangan pa ang mga naangkon nga mga medalya sang delegasyon sang siyudad sang Koronadal sa nagapadayon nga Batang Pinoy didto sa Puerto Princesa City, Palawan.
Sa interbyu sang Bombo Radyo Koronadal kay City Sports Coordinator Jomari Javellana, lunsay tig-apat ka gold, silver kag bronze medals ang naangkon sang aton mga atleta sa nasambit nga kompetisyon kahapon.
Kalakip sa mga nagkontribwer sa pagkuha sini amo sanday John Carlo Loreno, Romie Jonathan Rioja, kag Samantha Isabel Loreno (archery); Rene Boy Atam (boxing) kag Justin Basadri para sa Olympic round.
Ginpabugal man sini nga nangin maayo ang performance sang mga kabataan sa duration sang hinampang.
Samtang gin-ako man ni Javellana nga padayon ang iya pag-motivate sa mga kabataan apesar siya mismo ang pisikal nga ginakapoy apang wala niya ini ginapakita agud magsaka ang morale sang mga ini.
Nagapasalamat man ini sa suporta nga ginahatag sang mga ginikanan sa ila mga kabataan nga nagapartisipar sa nagkalain-lain nga mga sports events.
Base sa latest medal standing kahapon, nagapanguna ang delegasyon sang Baguio City nga may 21 gold medals, Cebu (16 gold), Quezon City (16 gold), ikaapat ang Davao, ikalima ang Pasig, samtang ikanapulo naman ang Makati City.
Nahibaloan nga yara sa ika-27 nga spot sa kasamtangan ang Koronadal City sa nasambit nga hinampang.
