KORONADAL CITY – Nagpaguwa sang reaksyon si Isulan RTC Branch 19 Judge Lorenzo Balo angot sa isyu sang liwat nga pagpatuman sang death penalty sa Pilipinas.
Sa interbyu sang Bombo Radyo Koronadal kay Judge Balo, nagakalipay siya bangud may mga parameters nga ginalantaw ilabi na nga duha lamang ka krimen ang ginalamita sa nasambit nga silot nga amo ang ilegal nga droga kag plunder, apang nagakabalaka man ini kun paano masiguro nga beyond reasonable doubt ang igapresentar nga mga ebidensiya batok sa isa ka suspek.
Dugang pa sang hukom, kinahanglan nga may yara sang mga pisikal nga mga ebidensiya kag indi lamang mga testimonya sang mga testigo ang kinahanglan agud mapamatbatan sang kamatayon ang isa ka suspek.
Ginpahayag pa sini nga indi suno pa handa ang Pilipinas sa nasambit nga silot gani para sa iya, mas maayo nga ikonsiderar anay ang mga butang kun sigurado ang mga mamalidha nga ang pagpatuman sini ang sigurado nga makapugong sa mga kriminal sa paghimo sang kalautan.
