KORONADAL CITY- Apektado subong ang masobra 100 ka pamilya ukon masobra 200 ka indibidwal bangud sa tuman nga pagbaha tuga sang mabaskog nga pag ulan sa banwa sang Lutayan, Sultan Kudarat.
Kalakip sa mga apektado kag mga ginbaha nga lugar amuh ang Brgy. Blingkong kun sa diin apektado man ang ektarya nga talamnan mangin ang mga hinuptan nga mga sapat gin anod sang tubig baha.
Nahibaluan nga nakaapekto ang pag-awas sang suba nga nagsulod sa mga puluy-an kun sa diin napilitan ang mga residente nga magbakwit.
Suno naman kay Brgy. Blingkong Brgy. Chairman Maximo Antonio, prayoridad nila ang kaluwasan sang mga residente sa ila barangay kun sa diin indi gilayon pabalikon sa ila mga puluy-an ang mga residente tubtob may pamahog sang mabaskog nga pag ulan kag pagbaha.
Nahibaluan nga luwas sa Sultan Kudarat gin ulan man ang pila ka mga lugar sa South Cotabato bangud sa bilog nga gab-i nga pag ulan kun sa diin suno kay PAGASA 12 forecaster Ben Rio epekto ini sang localized thunderstorm.
Ginpahanumduman naman ang mga residente sa mga low lying areas nga mangin alerto sa posible nga pagbaha kag landslide.
