KORONADAL CITY – Nagapadayon sa karon ang imbestigasyon sang PNP angot sa natabo nga pagpangluthang-patay sa magpakaisa sa syudad sang Cotabato.
Suno sa report nga ginpalab-ot sa Bombo Radyo Koronadal, ginkilala ang mga biktima nga sanday Arnold Chavez, 29 anyos, may asawa, isa ka pintor, residente sang Barangay Rosary Heights 4 kag pakaisa sini nga si Christopher Chavez, 36-anyso, may asawa, pedikab driver kag residente sang Purok Jasmin, Barangay Rosary Heights 2 sang nasambit nga syudad.
Base sa inisyal nga imbestigasyon sang Cotabato City PNP, nagalakat lang suno pa ang mga biktima sa Doña Pilar Street, Barangay Poblacion 4 pasado ala una sang kaagahon sang gulpi lang gintiro sang mga suspek nga sakay sa motorsiklo usar ang cal. 45 kag 9mm pistols.
Nagka-angkon sang igo sang bala sa nagkalain-lain nga parte sang lawas ang mga biktima kag gindeklarar nga dead on the spot.
Sa ngayon, padayon pa nga ginahibalo sang PNP ano ang motibo kag kun sino ang responsabler sa pagpangluthang-patay sa mga biktima.
