KORONADAL CITY – Ginakabig sang Makabayan bloc nga pinakamahigko nga eleksiyon ang 2019 midterm elections sang Mayo 13.
Sa interbyu sang Bombo Radyo Koronadal kay Bayan Muna Rep. Carlos Isagani Zarate, ginpahayag sini nga gingamit suno pa sang gobyerno ang tanan nga mga resources agud nga ikampanya ang ila nga mga kandidato kag ginaawhag nga indi pag botohon ang yara sa oposisyon.
Gin-insister man sini ang isyu sa technical glitch kun diin pito ka oras nga nadula ang pag-transmit sang data kag sang nagbalik na kadam-an sang administration bets ang nagdominar sa senatorial list.
Isa man sa mga natukiban sini ang isyu sang vote buying nga ginakabig garapalan.
Gindugang pa sini nga bangud sa ginpatigayon nga eleksiyon, dapat lamang nga imbestigaran ang pagpatigayon sang automated elections, labi na nga nadelatar ang mga corrupted nga mga SD cards kag vote counting machines.
Bangud sini, gin-insister nila nga bilang solusyon, magapatigayon sang mixed elections kun diin manual ang pagboto apang automated naman ang canvassing.
