KORONADAL CITY- Nagapadayon ang imbestigasyon sang mga otoridad sa nagluntad nga sunog sa isa ka ancestral house sa banwa sang Norala, South Cotabato.
Sa interbyu sang Bombo Radyo Koronadal kay Fire Inspector Richard Madayag sang BFP Norala, isa ka ancestral house ang nasunog sa Prk Merkado, Brgy Poblacion sa nasambit nga banwa nga nagresulta sa kamatayon sang biktima nga si Angel Fano, 43, makaligad nga nagbalik sa sulod sang nagakalayo nga ancestral house sa pagpati nga may nabilin pa ini nga himata.
Samtang, pilason naman ang 5 pa biktima nga ginkilala kanday Amador Fano, 82 anyos, tag-iya sang ancestral house, Cherry Ann Fano Matuay, Julie Rey Matuay, Joharie Marie Fano 6 anyos kag Jocelle Rey Fano Matuay, 4 anyos.
Nagagwa naman sa imbestigasyon nga nag-umpisa suno pa ang sunog sa kisame sang 60-year old ancestral house kag gilayon nga naglapta ang kalayo bangud usar ini sa light materials.
Yara naman sa ginabulubanta P300,000 ang inisyal nga damyos sang nasambit nga sunog.
Sa karon, isa mga ginalantaw nga anggulo sa sunog ang electrical short circuit bangud posible nga wala na naislan pa ang wiring sang kuryente sa nasambit nga balay sa madugay nga tini-on.
