KORONADAL CITY- Ginlaragway nga kasubong sa isa ka ghost town na sa subong ang Sri Lanka’s Capital nga Colombo makaligad ang pagpamomba sa pila ka mga simbahan kag hotels sang nakaligad nga adlaw sang dominggo kadungan sang selebrasyon sang Easter Sunday.
Nahibaluan nga kadamuan sa mga residente malapit sa ginluntaran sang bombings ang nagbakwit bangud sa kahadlok nga basi may kasunod pa ang nasambit nga panghitabo.
Sa karon yara na sa 1,000 security personnel ang gindeploy sa nagkalain-lain nga bahin sang Colombo samtang naghugpong man ang militar kag pulis sa pagpatigayon sang combined operations batuk sa iban pa nga mga suspek sa deadliest attacks sa Sri Lanka.
Kaangot sini, suno kay Bombo International Correspondent Narada Dissanayake, tagpamaba sang Sri Lanka Freedom Party, ginakabig nga isa ka religious attack ang nagluntad bangud halos tanan nga mga napatay ang mga Kristiyano kag gindungan pa sa selebrasyon san Easter Sunday.
Nagapabilin nga sarado ang madamo nga mga establisemento sa Colombo kag pila lamang ka mga salakyan ang makit-an sa mga nagapanguna nga mga dalanon.
Nagdeklarar naman sang Day of Mourning sa pungsod makaligad maglab-ot na sa halos 300 ang patay samtang yara saa masobra 500 ang pilason kag may mga napagkit man nga mga missing.
