KORONADAL CITY- Naglab-ot na sa masobra 60 ka mga puluy-an ang naguba sa pagpanalasa sang buhawi sa siyudad sang Tacurong sa probinsya sang Sultan Kudarat.
Sa eksklusibo nga interbyu sang Bombo Radyo Koronadal kay Barangay Kapitan Rudy Jacob sang Brgy. San Pablo Tacurong City, sa ila nga lugar naglab-ot na sa 30 ka puluy-an ang ginguba sang buhawi kun sa diin kadamuan sa mga ini ang natumbahan sang dalagko nga mga puno sang kahoy.
Pinakaapektado naman sang kalamidad ang Muslim Community sa nasambit nga barangay.
Samtang sa Brgy. San Emmanuel, suno naman kay Brgy. kapitan Roland Catbagan, yara sa 30 ka mga puluy-an ang ginguba sang buhawi apang maswerte nga wala sang may napagkit nga patay.
Kaangot sini wala man nakaluwas ang pila sa mga buluthuan kasubong sang San Emmanuel National High School Annex kag Abang Suizo Elementary School nga ginwasak man sang buhawi.
Sa karon nagapanawagan sang bulig ang mga opisyal sang nasambit nga mga barangay para sa ila mga apektado nga mga residente.
Ginahibalo pa man sang mga ini ang kabug-usan nga damyos sang nag-igo nga kalamidad.
