KORONADAL CITY– Ginapreprar na sang mga otoridad ang kaso nga isang-at sa mga suspek nga yara sa likod sang pagpasigabong sa isa ka kalan-an sa banwa sang Isulan Sultan Kudarat sang Myerkules.
Sa nangin interbyu sang Bombo Radyo Koronadal kay Police Lieutenant Colonel Junie Buenacosa, hepe sang Isulan PNP, pagakasuhan sang frustrated homicide kag frustrated murder ang mga yara sa likod sang pagpamomba sa Carlitos Restaurant sa Brgy Kalawang 2.
Suno kay Buenacosa, natalana man nga isapubliko sang Special Investigation Task Group Carlitos ang tanan ng mga detalye sa nasambit nga pag-atake nga ginkapilas sang 18 katawo.
Samtang, pila naman sa mga ginatudlo nga responsable suno pa sa pagpamomba amo ang Dawlah Islamiya Group ni Abu Toraife kag Bangsamoro Islamic Freedom Fighters.
Sa karon, padayon man ang panawagan sang PNP sa publiko nga indi pagpabay-an ang mga nabaton nga pagpamahog kag gilayon nga makig-angot sa ila agud indi na maliwat pa ang nagluntad nga pagpasigabong sa Isulan.
Una diri, nakabaton sang pagpamahog ang tag-iya sang Carlitos Restaurant nga pagabombahon ang lugar kun indi mahatag ang ginapangayo nila nga extortion money.
