KORONADAL CITY – Tuman ang kasubo sang mga himata sang isa ka high school student sa banwa sang Tampakan, South Cotabato makaligad maghikog ini bangud sa kontrobersiyal nga Momo challenge.
Sa interbyu sang Bombo Radyo Koronadal kay Brgy. Lampitak kapitan Marinillo Ngalon nga tiyo man sang biktima nga si alyas Toto, nakibot sila sang mahibaloan nga nagasinggitan ang iloy sang biktima nga naghikog suno pa ang iya bata.
Sa ila pagresponde, wala na nagaginhawa ang bata kag gindeklarar nga dead on arrival sa ospital.
Gin-usar suno pa sang menor de edad ang isa ka kalat kag ginhigot sa sulod sang ila balay kag didto naghikog.
Dugang sang kapitan, ginasunod suno pa sini ang mga mando ni Momo sa nasambit nga challenge.
Nahibaloan nga nagaisahanon lamang ini nga bata sang iya iloy kag ginlaragway nga mabuot nga bata.
