KORONADAL CITY- Nagapadayon ang imbestigasyon sang Isulan PNP sa nagluntad nga pagbungguanay sang duha ka mga salakyan sa atubang sang Sultan Kudarat Provincial Capitol sa banwa Isulan Sultan Kudarat.
Sa interbyu sang Bombo Radyo Koronadal kay Police Lieutenant Colonel Junnie Buenacosa, hepe sang Isulan PNP, ang nasambit nga vehicular accident ang ginakaulamiran sang isa ka pula nga ford ranger nga ginamaneho ni John Almodiente nga residente sang Koronadal City kag isa ka puti nga pampasahero nga van nga ginamaneho sang isa ka Abdullah Samson nga taga Cotabato City.
Nahibaluan nga padulong sa opposite nga direksyon ang duha ka mga salakyan sang magbunguanay ang mga ini kun sa diin nagbaliskad ang ranger samtang ang van ang nagbunggo sa puno sang lubi.
Pilason naman ang mga pasahero sang van nga sanday: Christine Garcia,Marjorie Posadas,Mark Lozada,John Navarette,Abdul Ahed,Ria Isabel Tobianosa,Sitti Aina Macasundig,John Paul Lerio,Nerisa Edris kag Rasul Edris nga lunsay nag angkon sang mga minor injuries kag kasamtangan nga nagapaayo.
Sa karon padayon pa nga ginahibalo kun sin-o ang may sala sa nasambit nga aksidente.
