ISULAN, SULTAN KUDARAT – Gin-ako sang kapulisan nga may kakulangan sa ila nga bahin rason nga nalutsan ang mga ini sang bomber nga responsable sa pagpasigabong sang IED pasado alas-7 kaina sang aga sa parking area sang Public Market sa Isulan, Sultan Kudarat.
Ini ang ginpahayag ni Pol. Lt. Col. Joven Bagaygay, hepe ng Isulan PNP sa interbyu sang Bombo Radyo Koronadal.
Suno kay Bagaygay antes pa man ang pagsigabong, may nabaton na sila nga report nga plano nga pasigabungan ang banwa sang Isulan kadungan sang foundation anniversary sang mga ini sang nagligad nga semana.
Ini man ang isa sa mga rason nga ngaa ginsuspender ni Mayor Marites Pallasigue ang mga aktibidad sa ila nga kafiestahan.
Samtang, sa separar nga statement nga ginpaguwa sang Western Mindanao Command, ginatudlo naman ang BIFF-Abu Toraife group na amo ang may kahimuan sang pagsigabong base sa signature sang IED.
Sa subong dako ang mabulig sang CCTV footage nga kuha sa pagsigabong agud nga matumod ang babaye nga suspek nga nagbutang sang bomba.
Extortion naman ang isa sa mga motibo nga natumod sang PNP sa insidente bangud sa ginpangayuan suno pa sang P250K ang alkalde.
Madumduman nga 8 ang pilason sa insidente kun diin duha na lamang sa subong ang nabilin sa balay bululngan matapos nga makaguwa na ang 6 sa mga ini bangud sa mga minor injuries lamang nga naangkon.
