KORONADAL CITY- Yara sa P400,000 nga reward money ang ginhatag sang alkalde sang Pikit, Nort Cotabato sa kung sin o man ang makatudlo sa mga suspek sa pagpangluthang sa mga estudyante nga nagresulta sa pagkapatay sa isa kag pagkapilas naman sang apat pa ka mga kaupdanan sini.
Ini ang ginpahayag ni PCol. Harold Ramos, Provincial Director ng North Cotabato Police Provincial Office sa interbyu sang Bombo Radyo Koronadal.
Suno sa opisyal, nakuha mismo sa CCTV footage ang mga suspects nga ginakabig nga mga persons of interest sa natabo nga serye sang pagpangluthang kag gilayon nga naghimo sang pamaagi ang LGU Pikit, lakip na ang Pikit PNP, North Cotabato Police, kag PRO 12 agud gilayon nga madakpan na ang mga suspek.
Kung madumduman, padayon nga ginapatuman sa karon ang Total Gun Ban makaligad ang asud-asud nga shooting incident nga napagkit sa banwa sang Pikit, North Cotabato.
Ini ang ila nga suhestyon sa ginhiwat nga Emergency Meeting on Public Safety, Peace and Order nga ginpangunahan naman sang Local Government Unit.
Gindugang pa sini nga mas ginpahugtan ang implementasyon sang kap-kap bakal sa tanan agud makontrol ang pagdala sang mga hindi lisensyado nga armas halin sa mga lawless persons.
Mas pasangkadun man sang mga checkpoints sa entrance kag exit points nga permi nagaagi ang mga suspek sa pagpangluthang.
