KORONADAL CITY – Gilayon nga nakabaton sang bulig gikan sa local government unit (LGU) sang Shariff Aguak, Maguindanao kag DSWD ARMM ang yara sa 300 ka mga evacuees gikan sa siyudad sang Marawi nga nagbakwit sa nasambit nga lugar.
Suno sa DSWD-ARMM, ginsakay sa mga dump truck ang nasambit nga mga evacuees gikan sa Marawi City nga sa subong nagadayon sa ila nga mga himata.
Ginsaysay pa sang isa sa mga evacuees nga ginkilala kay Saidda Adam, wala nila ginalauman nga makaluwas pa sila sang iya nga pamilya sa mga Maute terror group nga nag-atake sa ila nga lugar labi na kag naipit ini sa tunga sang engkwentro.
Maayo na lamang kag nalakip sila sa mga naluwas sang suldado kag wala nangin human shield sang mga Maute bangud dako suno pa ang posibilidad nga malamita man sila sa air strike sang mga suldado.
Suno sa iya, gin-agwanta nnila ang kakapoy kag kagutom para lamang makabiya sa tunga sang engkwentro nga nagapadayon tubtob sa subong.
Masubo naman ini bangud halos naguba ang ila nga puly-an, mga ginpundar nga pangabuhian kag mga panapton lamang ang ila nga bitbit paguwa sa Marawi kaupod ang iya 7 ka bata kag iban pa nga mga himata.
