KORONADAL CITY – Nagsaka na sa masobra 200 ka mga estudyante gikan sa Marawi City ang nakapa-enroll sa nagkalain-lain nga pampubliko nga buluthuan sa Rehiyon Dose humalin sang Lunes, Hunyo 5, 2017.
Ini ang ginkumpirmar ni DepED Region 12 Regional Director Dr. Arturo Bayocot.
Suno kay Bayocot, ang nasambit nga numero sang mga transferees ang nabaton sang regional office mula sa ibat-ibang division.
Sa siyudad sang Cotabato, naglab-ot na sa masobra 50 ang nakapa-enroll gikan sa Marawi City, ginsundan sang Sultan Kudarat division nga yara sa 40 kag ang iban nga mga estudyante, naakomodar sa siyudad sang Koronadal, General Santos kag probinsiya sang South Cotabato.
Dugang pa sang opisyal, magabaton sang mga transferees gikan sa Marawi City kag Lanao del Sur ang nagkalain-lain nga lugar sa Region 12 tubtob Hunyo 30, 2017 apisar wala sang nagakaigo nga dokumento kag IDs nga mapresentar ang mga ini.
Kaangot sini, gin-awhag ni Bayocot ang mga ginikanan sang mga estudyante nga wala pa nakapa-enroll labi na ang mga bakwit nga makig-angot sa pinakamalapit nga mga pampubliko nga buluthuan sa ila nga lugar.
Nahibalyan nga sa subong, yara na sa 1,096,320 ka mga estudyante ang nakapa-enroll gikan sa 9 ka division kun diin 1,746 diri ang elementarya samtang 499 naman ang sekondarya.
Gin-insister pa sang opisyal nga indi apektado ang pagtuon sang mga estudyante sa bug-os nga rehiyon sa nagapadayon nga implementasyon sang Martial law.
