KORONADAL CITY– Nagpagwa na sang desisyon ang lower court sang Saudi Arabia kaangot sa kaso sang 7 ka Overseas Filipino Worker’s sa nasambit nga pungsod nga may kaangtanan sa 2006 Jeddah Chop-Chop Killings.
Nahibaluan nga 2 sa 7 ka OFW’s ang ginapahamtangan sang silot nga kamatayon nga sanday Edison Gonzales, kag utod sini nga si Roland makaligad mapamatud-an nga guilty sa krimen samtang ang 4 nga iban pa nga kaupdanan nga akusado man sa krimen nga sanday Victor Alfonso, Omar Basilio, Efren Dimahon kag Joel Sinambang ang pagapahamtangan sang 4 tubtob 15 ka tuig nga pagkapreso kag silot nga 1,500 ka paglatigo sa ila mga lawas samtang ang 1 naman ka kaupod nila nga si Eduardo Arcilla nga pagapahamtangan man sang silot nga kamatayon ang nagtaliwan na samtang yara sa presuhan.
Kun madumduman ang 7 ka mga pinoy ang mga suspek sa brutal nga pagpatay sa 3 ka kasubong man nga mga pinoy sa Jeddah nga sanday Reno Lumbang, Jeremias Bucod, kag Dante Rivero sang Abril 2006 bangud sa isyu sang illegal gambling kun sa diin ang mga akusado kag ang mga biktima ang lunsay mga konektado sa gambling syndicates sa nasambit nga pungsod.
Samtang sa pihak sini, pwede pa nga mag-apela ang mga pinoy samtang indi pa final kag executory ang desisyon ilabi na nga may 2 pa ka layers of appeal ang Saudi Courts kun sa diin ang Hari ang pinakaulihi nga magadesisyon sa nasambit nga kaso.
