KORONADAL CITY- Emosyonal nga ginsaysay sa Bombo Radyo sang 2 ka suldado nga katapo sang 39th IB Philippine Army ang ila nga gin-agyan sa kamot sang New People’s Army bag-o pa man tigayon nga ginhilway.
Sa ekslusibo nga interbyu sang Bombo Radyo Koronadal sa mga Pisoners of War nga sanday PFC Samuel Garay kag Sgt. Solaiman Calocop , wala suno pa sila naghuna-huna nga makapauli pa sila sang buhi ilabi na nga mainit ang tensyon sa tunga sang pwersa sang gobyerno kag sang komunista kag rebelde nga grupo.
Dugang pa sang mga ini nga indi suno pa nila malipatan ang eksperyensya nga maglakat sang 3-5 ka oras sa kabukiran agud makalikaw sa pwersa sang gobyerno nga ginalikawan sang mga rebelde.
Sa pihak nga bahin, tuman naman ang kalipay nga ila nabatyagan bangud sa pihak sang tanan, buhi sa gihapon sila kag tigayon na nga nakaupod ang ila mga pamilya.
Nahibaluan nga ang madinalag-on nga paghilway sa mga gin abduct nga mga suldado ang bangud sa negosasyon nga ginpatigayon sang nagkalain lain nga sektor kag ang ginpatuman nga Suspension of Military Operations (SOMO).
Sa pihak nga bahin, gin-insister man sang tagpamaba sang NDFP sub-regional command nga si Ka-Macario nga ginrespeto suno pa nila ang tawhanong kinamatarong sang mga suldado kag nagapakita lang suno pa ini sang sinseridad sang NPA sa ginadihon nga peace talks sa tunga sang gobyerno kag sang rebelde nga grupo.
