KORONADAL CITY – Nagapadayon ang imbestigasyon sang kapulisan sa nagluntad nga aksidente nga gintunaan sang kamatayon sang isa kag pagkapilas naman sang napulo ka iban pa matapos nga mahulog ang isa ka forward truck sa pil-as sa bahin sang Sitio Platacan, Brgy. Christianuevo, Lebak, Sultan Kudarat.
Sa interbyu sang Bombo Radyo Koronadal kay SK Chairman JM Iman sang Brgy. Christianuevo, ginpahayag sini nga padulong kuntani sa banwa sang Esperanza, Sultan Kudarat ang mga biktima.
Sandig sa report, samtang ginausoy sang salakyan ang dalan padulong sa nasambit nga banwa nagkambya ang driver apang wala nag-gana ang clutch sang truck rason nga nagsudsod ini padalom sa pil-as.
Suno kay Iman, yara sa 15 tubtob 20 ka tapak ang nahulogan sang nasambit nga forward truck.
Gilayon naman nga nabuligan ang mga biktima kag nakuha sa madalom nga banglid kag gindala sa pinakamalapit nga hospital agud madapatan sang bulong apang isa ang tigayon nga ginbawian sang kabuhi.
