Nagligid-ligid ang isa ka dak0 nga inflatable pumpkin sa tunga sang dalan, nga daw nagdali man sa pagtambong sa pumpkin festival! Sa baylo nga mga salakyan ang mangin sentro sang atensyon, kalabasa pa ang nagpahinay sang traffic kag nangin bida sa karsada!
Sang Oktubre 11, 2026, nakita ni Daniel Wester ang nagapalagyo nga kalabasa samtang nagabiyahe pakadto sa pumpkin festival upod ang iya asawa kag tatlo ka bulan nga bata sa Cary, North Carolina, USA. Sa umpisa, daw makalingaw lang ang hitabo, pero nabalaka siya sang nakita niya nga ang air pump sang kalabasa nagalupad-lupad kag mahimo makaguba sang salakyan.
Bangud sini, nagbuligay ang pila ka tawo sa pagpunggan ang nagaligid nga kalabasa. Naghinay ang mga salakyan sa duha ka direksyon tubtob nga nauntat ini sa tupad sang mga naka-park nga salakyan. Dayon, ginpahaw-as nila ang hangin sang kalabasa kag gindala ini sa bodega sang farm.
Bilang pagpasalamat sa ila pagbulig, ginhatagan sila sang tag-iya sang farm sang libre nga tiket sa festival. Sa ulihi, ang kalabasa nga dapat dekorasyon lang nangin bida pa sa viral nga video!
Daw gusto man gali sini mag-enjoy sa festival, pero wala lang kabalo mag-agi sing husto sa highway! Sa sini nga hitabo, napamatud-an nga indi lang mga tawo ang mahimo magdulot sang traffic pati man ang kalabasa nga wala sing preno kag lisensya!
