KORONADAL CITY – Nangin mainiton ang baylohanay sang sabat sa tunga sang first lady sang banwa sang Tantangan kag isa ka board member bangud sa “face mask o bigas” nga post sa social media.
Kasunod ini sa ginpublishar ni Tantangan first lady Lyn Figueroa ang nasambit nga post butang nga gin-istoryahan sang mga netizen sang nasambit nga banwa.
Una diri, nagpaathag si Board Member Wilson Paclibar nga gin-istoryahan kag gin-aprubahan na sang Sangguniang Bayan kag Sangguniang Panlalawigan ang pagbakal sang mga protective gears kag facemask halin sa masobra P11 milyon nga pondo sa Bayanihan Grant halin sa national government.
Dugang ni Paclibar, ikapito na sa priority sa ordinansa ang mga food packs kag relief goods gani ginauna subong ang paghatag sang face mask agud maproteheran ang mga pumuluyo batok sa nasambit nga balatian.
Gintawag man sini nga malisyoso ang nasambit nga post.
Apang sabat ni First Lady Figueroa, sa ano nga matawag suno pa nga malisyoso ang iya gin-post sa social media kun halin suno pa kay Paclibar ang nasambit nga post.
Bilang isa ka concerned citizen, nakigsimpatiya lamang siya sa kahimtangan sang iya mga constituents labi na nga halos wala na sila sang may makaon.
Ginpaathag man sini nga isa ka personal nga opinyon lamang ang nasambit nga post.
Samtang nagaapela naman si Tantangan Mayor Benjamin Figueroa nga ipaagi na lamang sa husto nga forum ang nasambit nga isyu.
