Nagapadayon ang pagsalig kag kumpiyansa ni President Ferdinand Marcos Jr. sa Armed Forces of the Philippines (AFP) bisan pa sang pahayag ni NBI Director Melvin Matibag sa impeachment court nga may mga aktibo nga suldado nga lakip sa mga persons of interest sa ginasiling nga plano sa pagpatay sa Presidente.
Suno kay Palace Press Officer Undersecretary Claire Castro, wala siya sang impormasyon kun napalab-ot na ini sa Presidente antes sang testimonya ni Matibag sa impeachment court.
Apang, ginpasiguro ni Castro nga nahibaluan na sang Presidential Security Command ang amo nga impormasyon kag nagahimo sang nagakaigo nga mga tikang para sa seguridad sang Presidente.
Ginpahayag man niya nga importante nga makilala ang bisan sin-o nga mahimo nagtalang sa ila mandato agud maproteheran ang Presidente kag mapabilin ang integridad sang mga security forces.
Gin-athag man ni Castro nga sa subong wala sang ginapatigayon nga loyalty check sa militar, bangud ang amo nga isyu yara na sa pagdumala sang military leadership kag sang mga natungdan nga security agencies.
