Mas nagdako ang foreign debt sang administrasyon ni President Ferdinand Marcos Jr. sa una nga duha ka bulan sang tuig, suno sa Bureau of the Treasury (BTr).
Base sa pinakaulihi nga datos, nagdangat sa P887 bilyon ang kabug-usan nga ginhulam sang gobyerno tubtob sang bulan sang Pebrero nga mas mataas kumpara sa P552.7 bilyon sa kasubong nga bulan sang nagligad nga tuig.
Sa idalom sang administrasyon ni Marcos Jr., mas ginpaboran ang domestic borrowing, nga naglab-ot sa P684.3 bilyon kun sa diin sobra oa sa doble kumpara sa P293 bilyon sang nagligad nga tuig kun sa diin dako nga bahin sini ang halin sa treasury bonds kag treasury bills.
Bangud sini, kadam-an sang utang sang gobyerno sa kasamtangan ang halin na sa sulod sang pungsod.
Sa pihak nga bahin, nagnubo naman ang utang halin sa iban nga pungsod, nga nagdangat lang sa P202.7 bilyon nga mas manubo kumpara sang nagligad nga tuig.
Bangud sa pagsaka sang domestic borrowing, naglab-ot sa 77.1% sang kabug-usan nga borrowings ang domestic debt apang nagatupong man sa target sang gobyerno nga 77% sang financing halin sa sulod sang pungsod.
Nagapakita ini nga mas ginapili subong sang gobyerno ang mag-utang sa lokal nga merkado agud matustusan ang kinahanglanon nga pondo.
Sa kabug-usan, bisan nagapadayon ang pagsaka sang pag-utang, ginatuman gihapon sang gobyerno ang target sini nga mas dako nga bahin sang utang ang dapat maghalin sa sulod sang pungsod kumpara sa foreign debt.
