Ginpahayag sang State Department spokesperson nga si Matthew Miller nga ginahingyo sang United States ang iban pa nga mga pungsod paagi sa diplomatic engagements agud ipalab-ot sa Iran nga wala sila sang interest sa naga-ibwal nga gamo sa Middle East.
Suno kay Miller, ini ang ginakabig nga “critical moment” sang rehiyon kag nagahimo na sang tikang si US Secretary of State Anthony Bliken agud nga magkalma ang tensyon apang dugang pa sini nga nagapreparar man ang Washington sa tanan nga posible nga matabo.
Matandaan nga gin-assassinate ang Hamas leader nga si Ismail Haniyeh sa Iranian capital nga Tehran sang nagligad nga semana nga nangin rason sa pagtuhaw sang mga pagpapamahog sa pagtimalos batuk sa Israel kag nagpalala sang iban pa nga concerns natuhoy sa gamo sa Gaza nga mahimo magresulta sa Middle East war.
Ginabasol sang Iran ang Israel kag ginpahayag nga pagapinahan ini bisan pa wala gin-ako sang Israeli officials ang pagpatay. Ini bangud ginasuportaran sang Iran ang Hamas nga sa karon, ginakontra sang Israel sa Gaza kag sang Lebanese group nga Hezbollah bangud sa pagkamatay sang senior military commander nga si Fuad Shukr sa Israeli strike sa Beirut sang nagligad man nga semana.
Nagpakig-angot na ang top U.S. diplomat nga sanday Qatari Prime Minister Sheikh Mohammed bin Abdulrahman Al Thani kag Egyptian Foreign Minister Badr Abdelatty may kaangtanan sa tensyon sa Middle East.
Wala pa ginkumpirmar ni Miller kun napalab-ot ang mensahe sang Washingthon sa Iran kag kun ano nga paagi ang gingamit agud madul-ong ini.
