KORONADAL CITY – Preparado na ang programa nga igapatuman sang DepED-12 sa mga transferees gikan siyudad sang Marawi nga nakaangkon sang trauma bangud sa natabo nga kinagamo sa ila nga lugar rason nga nagsaylo sa Rehiyon Dose.
Ini ang ginpasiguro ni Anton Maganto, ang information officer sang DEpED-12 sa interbyu sang Bombo Radyo Koronadal.
Suno kay Maganto, ipatigayon ang nasambit nga programa matapos maobserbaran sa mga estudyante ang kahadlok sa natabo nga Marawi Siege kun diin halos indi ang mga ini maistorya kag mahipos lamang sa klase.
Dugang pa sang opisyal, nga sa nasambit nga programa igapaidalom sa stress debriefing ang mga ini agud nga makatuon snag maayo kag makapangabuhi sang normal.
Nahibaluan nga naglab-ot na sa 231 ang mga estudyante gikan Marawi City nga naka-enrol sa nagkalain-lain nga buluthuan sa rehiyon.
Sa nasambit nga numero, 59 diri ang mga transferees nga nakaenroll sa Koronadal; 32 sa Kidapawan, 19 sa Gensan, 50 sa Cotabato City, 10 naman sa Cotabato Province, 5 sa Tacurong, 17 sa South Cotabato, 35 sa Sultan Kudarat kag 4 sa Sarangani.
Nagalaum naman ang opisyal nga madugangan pa ini sa madason nga inadlaw.
Kadungan sini ginpasiguro naman sang opisyal nga mangin maayo ang sitwasyon sang nasambit nga mga transferees sa nagkalain-lain nga buluthuan sa Region 12.
