KORONADAL CITY – Nagapadayon pa sa karon ang imbestigasyon sang kapulisan sa nagluntad nga pagpangluthang sa isa ka babaye sa Purok San Jose, Brgy New Isabela, Tacurong City.
Ginkilala ni PCol. Joan Maganto, hepe sang Tacurong PNP ang biktima nga si Sittie Maria Natangcop Medal, 29 anyos kag residente sang Villagarde, Brgy New Isabela, sa nasambit nga siyudad.
Suno kay Maganto, samtang nagapahuway ang biktima sa boarding house sini gintawag suno pa sang suspek ang atensiyon sang biktima kag paglantaw sini sa bintana hinali na lamang ini nga ginpalukpan sang armas.
Gilayon naman nga nagpalagyo ang suspek matapos nga himuon ang krimen.
Sa subong nagapadayon sa pagpaayo ang biktima matapos maigo sa nagkalain-lain nga bahin sang lawas sini.
Nakuha naman sa ginluntaran sang krimen ang pila ka basiyo sang armas nga gingamit sang suspek sa pagpangluthang.
Sa subong, nagapadayon man ang manhunt operation batuk sa wala pa makilal-an nga suspek.
Ginatumod pa man sang kapulisan ang motibo sang krimen.
