Ginakabig nga mas mataas ag lebel sang kompetsiyon ang nagtakop nga SRAA meet 2026.
Ini ang nangin pahayag ni Magdaleno “Jojo” Duhilag – Regional Sports Officer sang Department of Education (DepEd) Region 12, sa interview sang Bombo Radyo Koronadal.
Suno kay Duhilag, halin pa sang una nga adlaw sang SRAA meet 2026, makita na ang mataas nga kompetisyon bangud halos tanan nga atleta determinado nga magdaog.
Ginpabutyag man niya ang iya pag-saludo sa nagkalain-lain nga delegasyon, plakip sa ila mga superintendent kag sa mga LGUs, bangud sa suporta kag dedikasyon sa mga manug-hampang.
Samtang madinalag-on man nga nagtakop ang Mr. and Ms. SRAA Meet 2026, kun sa diin nakuha nanday Sasha Epifany D. Dela Cruz – Tacurong City bilang Ms. SRAA 2026 kag John Lawrence Buenafe – Sarangani Province bilang Mr. SRAA 2026 ag kadaugan.
Dugang pa niya, ginakomendar nila ang provincial government sang Sultan Kudarat bilang host bangud sa bag-o kag de-kalidad nga mga playing venues, kasubong sang swimming pool kag rubberized oval.
Bangud sini, nagpasalamat si Duhilag sa tanan nga committees, sa provincial government sang Sultan Kudarat, sa mga LGUs, ginikanan, kag labaw sa tanan sa mga atleta nga naghatag sang ila best sa nasambit nga kompetisyon.
