Nagsumiter sang panibag-o nga petisyon sa Office of the Ombudsman sila Davao del Norte 1st District Rep. Pantaleon Alvarez kag Citizens Crime Watch.
Ang tuyo sini amo ang pagpangayo sa Ombudsman nga ipataw ang preventive suspension kay House Speaker Ferdinand Martin Romualdez, Majority Leader Mannix Dalipe, Rep. Zaldy Co kag Rep. Stella Quimbo.
Antes sini, nagsampa na man ang grupo sang 12 ka kaso sang falsification of legislative documents batok sa mga nasambit nga opisyal sa House tungod sa ginahambal nga mga insertions sa P241-billion nga 2025 national budget.
Pahayag sang mga petitioners, kinahanglan masuspinde ang mga opisyal agod indi nila maimpluwensyahan ang ginahimo nga imbestigasyon.
Suno pa sa ila, mabug-at nga isyu ang dishonesty, oppression, kag grave misconduct gani may sapat nga rason ini agod masuspinde ang mga gina-akusaran.
Ginpasiguro naman ni Alvarez nga indi ini pareho sang una nga ila gindulog sa anti-graft body kag mahimo pa ini una nga aksyonan para sa mas malawig nga imbestigasyon.
