KORONADAL CITY- Pagalauman sang mga biktima sang family outing tragedy ang bulig kag suporta sang South Cotabato Provincial Government makaligad ang madinuguon kag masubo nga aksidente sa Brgy. Lamsalome, Tboli South Cotabato.
Sa interbyu sang Bombo Radyo Koronadal kay Gov. Reynaldo Tamayo Jr. sang nahibaluan sini ang natabo, gilayon ini nagpakig-angot sa mga concerned agencies kasubong sang Provincial Disaster Risk Reduction and Management Office para sa pagresponder kag nagakaigo nga bulig sa mga biktima.
Kaangot sini luwas sa igahatag nga financial assistance sa mga survivors kag mga nabilin nga himata sang mga biktima, ginpasiguro man sini nga libre ang hospitalization sang mga biktima agud nga mahagan-hagan ang pagpangasubo kag problema sang mga ini.
Samtang sa pihak nga bahin, gin-awhag ni South Cotabato Governor Reynaldo Tamayo Jr. ang mga pumuluyo sang South Cotabato nga likawan anay ang pag agi sa Brgy. Lamsalome, Tboli, SoCot ilabi na sa mga dalagko nga mga salakyan nga may mga sakay nga madamo nga mga tawo.
Suno kay Governor Tamayo, personal sini nga napadulungan kag naagyan ang nasambit nga lugar rason nga nahibaluan sini nga kinahanglan nga doble halong sa pag agi sa nasambit nga dalan.
Bangud sa nasambit nga aksidente ginaproponer sini ang paghimo sang alternatibo nga dalan halin sa Tupi, South Cotabato padulong sa pila ka bahin sang South Cotabato apang nagakadapat nga mas patag kag luwas ang alagyan agud malayo sa mga aksidente.
