KORONADAL CITY- Ginlaragway sang mga Pilipino sa Midwestern US ang nagaluntad nga snowstorm bilang worst snowstorm nga ila na nabatyagan.
Sa ekslusibo nga interbyu sang Bombo Radyo Koronadal kay Jasmin Patnubay Chambers halin sa Banga, South Cotabato kag kasamtangan nga naga-istar sa Munster, Indiana, 35- 40 minutos ang kalayuon halin sa Chicago, naghatag na sang advisory ang Emergency Management Agency sang nasambit nga estado nga indi sila maggwa sa ila mga puluy-an tubtob wala pa naga untat ang snowstorm.
Dugang pa sini nga sa karun yara sa -37 degree celsius ang temperatura sa ila nga estado kun sa diin wala sang klase kag sarado ang mga talatapan.
Ginpahanumduman man sila nga magsuksok sang triple ukon masobra pa nga mga bayo agud makalikaw sa frostbite ukon anuman nga balatian bangud sa tuman ka lamig nga paniempo.
Kaangot sini pila sa mga tigulang ang na rescue naman kag nagapabilin subong sa mga shelters.
