Ginhingyo ni House Speaker Faustino “Bojie” Dy III ang mga mayor nga gamiton ang makabag-ong teknolohiya kag mga digital tools agud mapauswag ang paghatag sang serbisyo publiko kag mapabakod ang mga komunidad sa atubang sang bag-ong mga hagit sa kalibutan.
Ginhambal ini ni Speaker Dy sa ginpatigayon nga general assembly sang League of Municipalities of the Philippines.
Suno kay Speaker Dy, importante nga suportahan sang mga lokal nga opisyal ang adyenda sang administrasyon para sa digital governance sa idalom sang “Bagong Pilipinas.”
Gintumod man ni Dy ang eGov PH bilang isa ka ehemplo sang digitalisasyon sa gobyerno, nga may yara na kuno sang sobra sa 40 milyon ka mga gumagamit kag nagapadasig sang pagkuha sang mga serbisyo pareho sang business permits kag iban pa nga mga transaksyon.
Ginhikayat man ni Speaker Dy ang mga lokal nga panguluhan nga mag-koordinar sa Department of Information and Communications Technology (DICT) agud mapalapad pa ang digital services sa mga munisipalidad.
Suno pa sa iya, makabulig man ang teknolohiya pareho sang geo-mapping sa disaster preparedness bangod ginatudlo sini ang mga lugar nga madali tamaan sang landslides, pagbaha kag linog.
Mahimo man ini nga mangin giya sa pag-isyu sang development permits agud malikawan ang mga kalamidad kag maprotektahan ang kabuhi kag pangabuhi sang mga pumuluyo.
