KORONADAL CITY – Indi lamang ang nagamilagro nga 14 na krus ang ginadayo sang mga deboto subong nga Holy Week sa siyudad sang Koronadal kundi mangin ang isa ka shrine nga ginapanag-iyahan sang isa ka abogado nga yara man nahamtang sa nabukid nga bahin sang siyudad.
Gingingadlan ini nga three flags shrine nga nagasimbolo sang “Love,Hope kag Faith” nga nahamtang sa Sitio Acub, Barangay San Isidro.
Sa eksklusibo nga interbyu sang Bombo Radyo Koronadal kay Anthony Mamon, caretaker sang shrine, ang pamilya Montefrio mismo ang naghatag sang nasambit nga pangalan.
Suno pa kay Mamon, magalima ka tuig na gikan nga gintukod nga shrine nga may 162 steps pasaka sa krus nga may imahen ni Jesus Christ.
Antes pa makasaka sa ibabaw magaagi ka anay sa isa ka groto ni Virgin Mary.
Buwas, ginalauman naman nga magadagsa pa ang mga tawo bangud sa ipatigayon nga station of the cross didto.
Nahibaluan nga nangin panata na sang tag-iya sang shrine ang pagpatigayon sang station of the cross nga bukas naman sa publiko.
