Naghulat sag masobra tatlo ka oras si Tatay Arceño Cadelino agud makakuha sang coupon antes makabakal sang P20 kada kilo nga bugas.
Sa interview sang Bombo Radyo Koronadal kay Cadelino, iya ginahayag nga dako nga bulig ang mas barato nga bugas sa ila adlaw-adlaw nga budget kun sa diin mahimo siya makatipon sang tubtob P700 kumpara sa commercial nga bugas.
Suno pa sa iya, ang kwarta nga iya natipigan mahimo niya gamiton sa pagbakal sang sud-an kag iban pa nga kinahanglanon sang pamilya.
Ginpahayag niya nga importante ang amo nga programa ilabi na sa mga pamilya nga pigado sa pag-budget sang ila limitado nga kita.
Para sa iya, apisar kinahanglan maghulat sang malawig nga tion, dakogihapon ang benepisyo bangud ang natipigan nga kwarta mahimo magamit sa iban pa nga panginahanglan sang panimalay.
Bangud sini, ginpanawagan ni Cadelino ang gobyerno nga ipadayon kag palaparon pa ang programa sang P20/kilo nga bugas agud mas madamo nga pamilya ang makabenepisyo.
