KORONADAL CITY- Nabatyagan na sang mga Overseas Filipino Workers sa Middle east ang tesnsyon sa tunga sang pungsod Qatar kag mga Arab nations nga ginakabug-usan sang Saudi Arabia, United Arab Emirates, Egypt kag Bahrain may kaangtanan sa gihapon sa ginapangatubang nga pinakadako nga diplomatic crisis sang nasambit nga pungsod.
Sa impormasyon nga ginpalab-ot ni Bombo International Correspondent Glorydil Aperocho Horiana nga kasamtangan nga naga-ubra sa pungsod Qatar, naka lockdown suno pa ang nasambit nga pungsod kag ginapreparahan man sang Qatar ang ila tikang sa oras nga maglala pa ang tensyon sa tunga sini kag sang iban pa nga Arab nations kasunod sang pag-utod sang mga ini sang diplomatic ties sa nasambit nga pungsod bangud sa akusasyon nga ang Qatar ang yara sa likod sang destabilisasyon sa rehiyon kag ini man ang nagahatag sang suporta sa Islamist groups.
Samtang sa pihak nga bahin, ginpasiguro kag preparado suno pa ang gobyerno sang Qatar sa anuman nga tikang sang mga Arab nations nga nag-utod sang ila diplomatic ties sa nasambit nga pungsod.
Dugang pa nga nakahanda suno pa ang ila pungsod kag ginpasiguro nga may ikasarang nga protehiran ang ila mga pumuluyo pinaagi sang ila military capability kag pakig-alyansa sa westen coutries nga nagasuporta sa ila.
Kaangot sini, nakatutok man ang mga OFW’s sa mga nagaluntad sa bug-os nga middle east sa kahadlok nga posible ini magtuga sang mas malala pa nga problema sa rehiyon.
