KORONADAL CITY – Arestado ang isa ka lalaki bangud sa paghupot sang indi lisensyado nga armas sa sulod sang puluy-an sini sa Purok Bagong Sikat, Poblacion, Tampakan, South Cotabato.
Ginkilala ni Police Major Jerald Francisco Gervacio, hepe ng Tampakan Municipal Police Station, ang suspek nga si alias “Mel”, nga residente sang nasambit nga lugar.
Paagi sa search warrant, ginsalakay sang gintingob nga pwersa sang Tampakan MPS kag sang 1205th Regional Mobile Force Batallion 12 ang puluy-an sang suspek.
Suno kay PMaj Gervacio, sa ila ginpatigayon nga operasyon, nakumpiska sa panimalay sang suspek ang isa ka unit sang Cal. 38 nga may kalakip nga apat(4) ka bala.
Magapangatubang naman sang kaso nga paglapas sa RA 10591 ukon Comprehensive Firearms and Ammunitions Regulation Act ang suspek nga yara na sa kustodiya sang Tampakan MPS.
Kadungan sini, ginaawhag sang kapulisan ang publiko nga makig-angot sa ila agud mapunggan ang paglapta sang illegal nga armas.
![](https://img.bomboradyo.com/koronadal/2024/07/Illegal-firearms.jpg)