KORONADAL CITY – Ginalauman nga magaabot alas-10:45 kagab-i sa Ninoy Aquino International Airport (NAIA) terminal 1 ang isa ka Pinay Domestic Helper nga narescue gikan sa abusado nga employer sa Riyadh, Saudi Arabia.
Ini ang ginpalab-ot nga impormasyon ni Bombo International Correspondent Reymer Forro.
Ginkilala ang nasambit nga OFW nga si Elvie Suela, yara sa legal nga edad, may duha ka bata kag residente sang Barangay Topland, Koronadal City.
Suno kay Forro, naghingyo sang pasaylo ang pamunuan sang Majid Recruitment Agency kun ngaa nadugayan ang pagpauli kay Suela.
Madumduman nga sang Disyembre 2017 pa nagpalapit sa waragwagan sang Bombo Radyo Koronadal ang pamilya ni Suela agud nga buligan ini makapauli bangud sa indi maagwanta ang pagpanakit kag pagpanghadlok sang iya nga employer nga babaye.
Magluwas diri, ginahana man ini nga luguson sang iya employer nga lalaki.
Nagbalatian man ini kag indi na halos makatrabaho sang maayo.
Una na nga ginpahayag sini nga kun madugayan pa siya sa iya nga mga employer, nahadlok ini nga madula sa maayo nga panghuna-huna.
