KORONADAL CITY – Tuman nga ginkalipay ni Tboli Mayor Dibu Tuan ang tigayon nga pag-ayo sang pinakauna nga kaso sang covid-19 nga napagkit sa probinsya sang South Cotabato.
Sa interbyu sang Bombo Radyo Koronadal kay Mayor Tuan, iya nga ginkalipay ang pag-ayo ni PH2173, 52 anyos kag may travel history sa Manila makaligad nga nag-negatibo ini sa iya re-test sa nasambit nga virus.
Suno sa alkalde, dako man ang iya pagpati nga mangin negatibo ang resulta sang test antes pa man magguwa ang resulta.
Ginakonsiderar man sang alkalde ang pagpalahog sang ginapatuman nga total lockdown sa nasambit nga banwa apang igapatuman sini ang mga preventive measures agud malikawan ang pagdugang sang nasambit nga kaso.
Nahibaloan nga nagdugay sang duha ka semana ang ginpatuman nga lockdown kasunod sang pagkapagkit sang una nga kumpirmado nga kaso sa ila banwa.
Dako man ang pagpasalamat ni Mayor Tuan sa mga frontliners nga magtutok sa ginakabig nga hotzone sa Brgy. Lemhaku.
