KORONADAL CITY– Naka half-mast sa subong ang hayahay sang Kapitolyo sang South Cotabato kag ang banwa sang Tantangan para ipakita ang pagpakig-unong sa nagtaliwan nga si Philippine Councilors League (PCL) President -South Cotabato Chapter kag Board Member Wilson Paclibar bangud sa halit sang covid-19.
Madumduman nga gin kumperma mismo ni South Cotabatao Vice Governor Vicente “Vic” De Jesus nga nag taliwan ang nasambit nga opisyal kag nalutos ini sa iya pila ka adlaw nga pakigbato sa balatian nga covid-19.
Samtang ,madamo pa sang mga plano nga ipatuman kuntani para sa banwa sang Tantangan kag sa probinsya sang South Cotabato ang nagtaliwan nga si Board Member Wilson Paclibar, apang nautod na ini bangud sang halit nga dala sang balatian nga Covid-19.
Ini ang ginpakigbahin man sang isa sa mga staff sini nga si Mark Anthony Plantig sa eksklusibo nga interview sang Bombo Radyo Koronadal.
Suno pa kay Mark, indi gid matupungan ang kaalwan kag pagkamabinuligon sang nagtaliwan nga opisyal kag iya nga ginakabig nga “Kuya Nonoy”.
Base man sa mandato kag protocol sang Departamento sang ikaayong lawas, dalayon nga gin cremate ang patay nga lawas sang nasambit nga opisyal.
