KORONADAL CITY – Nakapauli na sa pungsod ang isa naman ka Overseas Filipino Worker (OFW) nga biktima sang pagpang-abuso sang iya nga employer sa pungsod Kuwait.
Ini ang ginkumpirmar ni Bombo Middle East Correspondent Boyet Forro.
Ginkilala ang OFW nga si Genevieve Dujay Cequina, residente sang Purok 2, Brgy. Dumaligdig, Tantanagan South Cotabato.
Suno kay Forro, yara na sa Metro Manila si Cequina kag ginahulat na lamang nga makakuha sang ticket papuli sa probinsya.
Kun madumduman, naghingyo sang bulig sa Bombo Radyo Koronadal ang pamilya Cequina agud nga maghingyo sang bulig sa problema ni Genevieve sa iya nga Employer sa Kuwait.
Sa nangin panaysayon sang iloy sini, pila ka bulan nga wala makabaton sang sweldo si Genevive kag ginpasibangdan nga nagpangawat sang mga gamit sang iya employer.
Magluwas sini, ginpasibangdan pa si Genevieve nga patyon sa tion nga magsugid sa pamilya kag sa Philippine Embassy.
Paagi kay Forro, napadasig ang pag-aksiyon sang POLO-Kuwait kag napasugot ang employer nga makapauli si Cequina.
Lubos naman ang pagpapasalamat sang pamilya sa Bombo Radyo bangud nga nakapauli na sa pungsod si Genevieve.
Samtang, suportado naman sang pamilya Cequina sa tion nga ipatuman ang total ban deployment sang mga OFW sa nasambit nga pungsod.
