NORALA, SOUTH COTABATO – Nagpahayag sang kabalaka ang pamilya Padernal makaligad nagpadulong ang isa suno pa ka miyembro sang Department of Foreign Affairs (DFA) kag may ginpapirma suno pa nga papeles sa ila.
▶Mga OFWs sa Kuwait, ginahimo nga negosyo sang mga Agency kag Kuwaiti employers?
▶Mga OFWs sa Kuwait, ginakampanya ang “no blood money” sa Villavende case
▶Employer ni Jeanelyn kuntani mapanabat na agud malab-ot ang hustisya – OWWA Admin. Cacdac
Nagluntad ini sa katungaan sang misa sa lubong ni Jeanelyn Villavende sa banwa sang Norala, South Cotabato.
Ginbuyagyag ni Richard Padernal, ang tiyo ni Jeanelyn nga maswerte na lamang nga napunggan ini ni OWWA Administrator Hans Leo Cacdac sang ginpalapitan sang suspetsado nga indibidwal ang tiya sang biktima nga si Nelly agud may pirmahan suno pa nga isa ka dokumento.
Ginpahayag sini nga nagaagi anay sa iya ang tanan nga mga dokumentos antes ini magdesisyon nga pirmahan ukon pamalibaran.
Magluwas diri, kasubong nga ginainsulto man sila sang Kuwaiti government sang ginpadal-an sila sang isa ka package nga nakapangalan kay Villavende apang indi naman sa iya ang kaundan sini.
Kalakip sa mga kagamitan nga ginpadala sa ila amo ang petroleum jelly, lipstick, itom nga maskara kag gin-usar na nga underwear.
Sa ila pagpati, kasubong nga ginapalab-ot sang Kuwaiti government kun ano nga sahi nga babaye si Jeanelyn didto sa ila pungsod.
Apang sa pihak sang mga pagtilaw kag problema nga ila naagyan, nagapasalamat ini sa gihapon sa nilibo ka tawo labi na ang OFW sa padayon nga pagsuporta sa ila pagpakigbato agud maangkon ang hustisya sa napatay nga OFW.
