KORONADAL CITY- Nagalaum sa karun an pamilya sang Pinay Domestic Helper sa pungsod Kuwait nga dako ang mabulig sang pag-alegruhanay sang gobyerno sang Pilipinas kag sang Kuwait agud mabuligan ang ila himata nga kasamtangan naka comatose sa Kuwait.
Sa interbyu sang Bombo Radyo Koronadal kay Robert Remejio, utod sang Pinay DH nga si Nelia Remejio 54 anyos, nagtuga suno pa sang tuman nga kabalaka sa ila ang isyu angot sa pagrescue sang embassy officials sa mga OFWs nga may problema makaligad ini nga ginkadismaya sang gobyerno sang Kuwait bilang paglapas sa ila nga soberenya.
Samtang makaligad makaangkon sang kasugtanan sanday Pres. Rodrigo Duterte kag ang Kuwaiti Government nabuhian suno pa sila sang paglaum nga mabuligan kag makapauli ang ila utod sa bulig sang ginaduso nga pag-angkon sang memorandum of understanding (MOU) para sa proteksyon sang mga overseas Filipino workers (OFWs).
Nahibaluan nga na-coma ang Pinay DH makaligad nga ma heat stroke suno pa ini sang nakaligad nga semana kun sa diin padayon pa ang pakig-angot sa mga ahensya nga natungdan.
