KORONADAL CITY – Nagpangayo sang bulig pinaagi sa Bombo Radyo ang mga himata sang isa ka OFW sa Riyadh, Saudi Arabia nga ginmaltratar sang iya nga amo.
Ginsaysay sa Bombo Radyo Koronadal ni Lovely Joy Mamon nga tuman nga kabudlay ang nabatyagan sa karon sang iya nga iloy nga si Miriam Gallo Aguacito, 39 anyos, kag residente sang Sto Nino, South Cotabato bangud sa pagpang-abuso sang iya nga employer.
Suno kay Mamon, base sa pinaka-ulihi nila nga pag-istoryahanay sang iya nga iloy, nahulog ini sa hagdan kag nagapangayo sang bulig sa iya nga amo nga ipa-ospital ini apang wala suno pa ini gintugutan kag sa baylo ginpa-obra pa ini.
Magluwas pa diri, wala man suno pa ini ginakaon sa sulod sag 4 ka adlaw, ginabasa sang tubig kag ginabunggo sa pirtahan.
Apela ni Mamon nga kuntani mabuligan sila nga makapauli ang ila nga iloy.
Nahibaluan nga 6 ka bulan na nga nagatrabaho sa nasambit nga pungsod si Aguacito.
