KORONADAL CITY- Gilayon nga nagpatigayon sang pagsuspender sang klase sa mga buluthuan sa banwa sang Pigcawayan, North Cotabato matapos ang nagluntad nga pagpangatake sang Bangsamoro Islamic Freedom Fighters sa pagpamuno sang isa ka Kumander Abunawas sa isa ka BPATS outpost sa Brgy. Malagakit sa nasambit nga banwa.
Sa interbyu sang Bombo Radyo Koronadal kay 6th Infantry Division Philippine Army Spokesperson Capt. Arvin Encinas, padayon ang paglagas nila sa kapin 200 ka mga rebelde nga armado nga nagpatigayon sang pag-atake sa lugar kun diin prayoridad nila nga maluwas ang mga sibilyan nga ginhostage sang armado nga grupo agud himuon nga human shield sa ila nga pagpalagyo.
Gilayon naman nga nagresponder ang tropa sang gobyerno kag nakig-engkwentro pa sa mga rebelde kun diin tubtob sa subong padayon pa nga ginahibalo ang napagkit nga mga casualties.
Samtang, dako naman ang posibilidad nga ginhimo sang mga rebelde ang pag-atake agud nga kilalahon man sila sang terorista nga ISIS kag bilang pagtimalos sa napatay nga medical officer sang mga ini sa isa ka operasyon sa Shariff Aguak, Maguindanao.
Sa subong, nagdeploy sang dugang nga pwersa ang militar agud nga lagson ang mga armado nga nagtuga sang kalakasan sa lugar.
